6 Ereyo/Kelmado oo aan Munaasab ahayn inaad ku dhahdo qof aad xiriir Jacayl Wadaagtaan

Waxaa jira ereyo aad u mug wayn kuwaasoo si fudud heerka xiriirka lamaanaha kor ugu qaadi kara ama hoos u ridi kara. Sida caadiga ah, dadka lamaahana ahi waxba Makala qarsadaan oo waxkastaa ayay is oran karaan, Qofka ku jecel wuxuu aad u nugul yahay saamaynta ereyada afkaaga kasoo baxa sida ammaanta, dhalleeceynta, faallaynta iyo nooc kastaa oo wadahadalka kamid ah ee aan dheguhu jeceleysanayn. Marka uu qof xiriir jacayl kaala dhexeeyo, waa inaad aad uga taxadartaa hadalka aad dhahayso iyo qaabka ama sida aad u dheheysaba waayo dhaawaca ay geystaan ereyo iska fudud ayaa marmarka qaar noqonaya kuwo aan laga soo kabsan Karin.

Waxaan qormadaan ku soo qaadan doonaa 6 weedho/hadal oo ay tahay inaadan marna kula hadaaqin qofka aad xiriir wadaagga tihiin. Waa haddii aadan rabin inuu xiriirkaas burburo. 

1. Wax Aad ogtahay Malahan 

Xittaa haddii uu jiro wax dhexdiina muran ku keenay, ereygaasi wuxuu idiin horseedi karaa kala fogaasho iyo inay xaaladdu sii adkaato. Waayo waxay wiiqeysaa garaadka lamaanahaaga/da. Haddii aad dareensan tahay in lamaanaagu uusan fahmsanayn ujeedada dooddaada, waxaa kasii habboon inaad hadalka adiga isku koobto iyo sida aad dareemeyso ee haku fogaan qaladka lamaanahaaga. 

2. Qofkastaa og waxaa Tahay 

Waa kelmad aad u xun taasoo si toos ah u dhaawici karta qofka markaad ku dhahdo sidaas. Marwalba Iskudey in aadan isbarbardhig ku sameynin lamaanahaaga iyo dadka kale. Waayo saameynta iyo niyad jabka ay arrintaas ku keeni kartaa waa mid cawaaqib aad xun leh oo ay dhib badan tahay in laga soo kabsado. 

3. Muuqaalkaaga Wuu Is Bedelay 

Kahor intaadan dhaliilin isbedelka muuqaal iyo jireed ee lamaanahaaga sida cayilka, isbdelka midabka iwm si aad ah uga feker waxa sabab u noqon kara isbedelkaas. Waxaa laga yaabaa inay sababahaas ahayn kuwo uu qofku doortay, waa inaad si qoto dheer u baartaa waxa keenay. Welwelka, Fikirka, Shaqada badan, dhafarta badan iyo Jacaylka xafdhaafka ah intaba waxay lamaanahaaga ku keeni karaan inuu muuqaal ahaan iyo jir ahaanba u doorsoomo. Marka waxaa haboon inaad kula dadaasho xalinta dhibaatooyinka keenay isbedeladaas. 

4. Waan Ku Nacay 

Sida uu ereygaasi in afka looga dhawaaqo u fudud yahay ayuu haddana saamaynta uu qalbiga reebo waxay jireysaa bilooyin iyo sanado. Marwalba oo waxyaabo iska fudud laisku maandhaafo waxaa imaaneysa in ereygaas dib loo soo gocdo. Haku fududaan isticmaalka ereyga “Waan ku nacay” xitaa marka aad si daran isu dagaashan tihiin. Way dhici kartaa inaad hadhow dib dambe aad ka raali geliso laakiin saamaynta ereygaasi marna ma daaweyn kartid. 

5. Waxaas Waqti uma haayo 

Waxaa laga yaabaa inaad tahay qofka aad mashquul badan oo shaqooyin badan haya, laakiin mashquulkaasi yuuna dhibaateynin lamaanahaaga. Adoo shaqo ku marmarsiyoonaya inaad sidaas ku dhahdo ruux ku jecel waxay xanuun ku beereysaa qalbiga lamaanahaaga. Waxaa laga yaabaa arrin haysata qofka inuu kaala hadli rabo, waxaana haboon inaad waqti u qorsheyso sikastoo aad mashquul u tahay. Markaad waqti u qabato qofku wuxuu dareemayaa inaad daneyneyso. 

6. Waxaas Waa Doqonimo 

Waa inaad aad uga taxadartaa marka lamaanahaagu uu kuu sheego arrin ay muhiimad la leedahay. Marka aad dareento inaysan wax ahmiyad wayni ahayn haku dhihin waxaas waa doqonimo. Kalsoonidu waa udub dhexaadka xiriirka jacayl oo farxad ku dheehan tahay. Waa inaad u muujisaa kalsooni waxwalba laguugula wadaagi karo. 

WQ: Macalin Jacaylow