Dhibaatooyinka Ka Dhasha Burburka Qoyska

Dhibaatooyinka ka dhasha burburka qoyska way farabadanyihiin, laakiin haddaan isku dayno inaan tilmaanno kuwooda ugu sii daran waxaan u kala qaadaynaa Afar 4 qaybood.

1. Dhibaatada ka soo gaarta Caruurta
2. Dhibaatada ka soo gaarta labada lamaane
3. Dhibaatada ka soo gaarta labada dhinac
4. Dhibaatada ka soo gaarta Bulshada

1. Dhibaatada ka soo gaarta Caruurta

Waxaa hubaal in dhibaatada ugu wayni ee ka dhalata qoys burburka ay ku dhacdo Carruurta haddii ay caruurtu lahaayeen qoyskaasi burburay.

Caruurta waa hibo Alle nagu manneystay waxayna u baahan yihiin guri iyo gole nabadeed oo ay xannaano iyo daryeel wanaagsanba  ka helaan, haduu burburo qoyska waxaa la isku qabtaa khilaaf na uu ka dhashaa cidda haysanaysa caruurta, iyo sida loo maamulayo, sidoo kale inta badan waxay ku dayacmaan is ximin iyo is xifaalin ka dhaxaysa labada waalid.

Caruurtu waxay wajahaan dhibaato marka labadoodii waalid ay qoysas kale dhistaan, tusaale ahaan hadii ilmaha uu aabaha qaato, ka dib na uu naag kale guursado ilmihiina u geeyo inta badan dhibaato ayay la kulmaan ilmahaas oo suugaan badan oo laga tiriyay baaba jirta sida ilmahaas ay u tabayaan hooyadood.

Sidoo kalena haddii carruurtu ay hooyadood la nool yihiin, oo ayna guursato nin kale oo aan aabahooda ahayn inta badani waxaa ka dhasha in carruurtu ay dareemaan inay la nool yihiin qof aan aabohood ahayn sikasta oo ay xannaano uga helaan ninkaasina wali way dareemayaan dareenkii aabenimo in uu ka maqan yahay, sidoo kale waxa dhacda in niman ka qaar xitaa masruufka ka goostaan iyagoo ka masayrsan guurkeeda.

Inta badan labada waalid markay kala tagaan ilmaha waa loo kala sheekeeyaa oo aabaha waxa laga yaabaa inuu ilmaha u sheego in hooyadood ay sabab u ahayd burbur ka qoyska, sidoo kalena hooyada waxa laga yaabaa inay dareenkaas u gudbiso ilmaha, badanaana ilmaha waxay la dareen yihiin aabe ama hooyo hadba qofka ay ka helaan dareen ka iyo naxariista waalidnimo.

Dhibaatda burburka qoyska ee caruurta kuma eka oo kaliya yaraantooda ee xitaa hadii ay waynadaan oo ay dad waxtar leh noqdaan waxay ku qasban yihiin inay kala qariyaan labadooda waalid oo marka ay wax siinayaan ay si hoose u kala debaraan.

Caruurta qoys buruburay ka soo jeeda waxay saamayn ku yeelataa waxbarashadooda, caafimaadkooda, farxadooda, iyo waliba maskaxdooda iyo hab fikirkooda, waana dulmanaha uu dhibka ugu wayn ka soo gaaro burburka qoyska.

2. Dhibaatada ka soo Gaarta Labada Lamaane

Labada lamaane markay is furaan inta badan waxa ka soo gaarta dhibaato, waxana ugu wayn niyad jab uu qof ku dareemayo in wax uu muddo soo dhisayay iyo ka burbureen, raadkeeda ayay na leedahay, sidoo kale waxa ka dhalata in qofku uu ka caago ama iska diido guur danbe ba, isagoo ka niyad jabaya nolosha qoyskaba, waxana jira dumar badan iyo rag badan oo goostay inay ilmohooda iska korsadaan hadiiba uu gurigii ka burburay, waxaa kale oo jira kuwo intay nolosha si un uga niyad jaba tahriib iyo safaro khatar ah ku hamiya, sidoo kale waxaa jira mararka qaarkood in gabadhu nin aysan reerkoodu la rabin ay raacdo taasoo haddii la soo furo uga dhigan inaysan haysan meel laga soo dhoweynaayo waayo gurigii arrin aysan reerkeedu jeclayn ayay kaga soo baxdey markii horeba dhibaato walwal iyo walaac ayaa qofkaasi oo kale u dheer.

Inkastoo ay jiraan dad markay kala tagaan ka dib xitaa uu xiriir wanaagsan ka dhexeeyo hadana, lamaanaha qaar waxaa soo kala gaara waxay noqdaan uurkutaalo mahadho ah oo aan xusuustoda marna ka gu’in.

3. Dhibaatada ka soo gaarta Labada Reer

Labada reer/ qaraabo ee lamaanaha uu qoysku ka burburo waxa ka dhalata mararka qaar inuu khilaafka qoyskaas saamayn ku yeesho gaar ahaan haddii dad kaas is furay ay qaraabo sii yihiin, odayaasha hawsha ku jirana aysan si wanaagsan u maaraynin, oo mararka qaarkood waxa dhacday inay dad walaalo ah kuwo qaraabo dhaw ah ku kala dhintaan oo aysan salaanta islaamka isaga qaadaynin qoys burburay dartiis.

Iyadana waa arrin khatarteeda ku leh bulshadeena Soomaaliyeed.

4. Dhibaatada ka soo gaarta Bulshada

Bulshada Soomaaliyeed dhibaato wayn ayaa ka soo gaarta, burburka qoysas ka, waayo colaado iyo cuqdado ka dhasha burbur qoys iyo caruur xoog iyo dacwad lagu kala qaato ayaa dagaalo sababa marar ka qaar, dad badanna ay ku waxyeeloobaan.

Sidoo kale caruurta aan tarbiyadii iyo daryeelkii ay u baahnaayeen aan helin bulshada ayay culays ku yihiin oo xitaa amni darrada ayay qayb ka yihiin mararka qaarkood.

Qore: Ifiye